"Пушкин картасы" программасын 2021 елның 1 сентябреннән башлап җибәрәчәкләр
Татарстан Республикасы мәдәният министрлыгында министр Ирада Әюпова катнашында узган чираттагы киңәшмәдә Пушкин картасы турында сөйләштеләр.
Биредә Татарстан мәдәният министрлыгы буйсынуындагы мәдәният учреждениеләрен әлеге проектка кертү мәсьәләләре турында фикер алыштылар. Киңәшмәдә Татарстан Республикасы мәдәният министрының беренче урынбасары Юлия Әдһәмова, Казан шәһәре Башкарма комитеты җитәкчесенең социаль мәсьәләләр буенча урынбасары, Казан шәһәре Думасы депутаты Гүзәл Сәгыйтова, Татарстан Республикасы яшьләр эшләре буенча министрның беренче урынбасары Тимур Сөләйманов һәм башкалар катнашты.
1 сентябрьдән 14-22 яшьлек затларга театрларга, киноларга яки музейларга бару өчен яңа финанс ярдәм күрсәтеләчәк.
Россия мәдәният министры Ольга Любимова хәбәр иткәнчә, илдә «Пушкин карталары» барлыкка киләчәк, дәүләт дүрт айга өчәр мең сум акча салачак. Акчаны бары тик мәдәни чараларга гына тотарга мөмкин булачак.
Программага барлык төбәкләрдә театрлар, музейлар, концерт заллары, китапханәләр дә кушылачак.
«Пушкин картасын» турында Россия Президенты Владимир Путин «Турыдан-туры элемтә» барышында әйткән иде.