«Әкият» курчак театрында Яңа ел тамашалары башлана
18 декабрьдә «Әкият» Татар дәүләт курчак театрында балалар өчен рус һәм татар телләрендә Яңа ел тамашалары башлана.
Нәни тамашачыларга театр легендар «Кар патшабикәсе» - «Кай һәм Герданың яңа ел маҗаралары» дигән яңа интерпретация тәкъдим итә.
Маҗаралар, уеннар, күңелле биюләр, кызыклы геройлар һәм әлбәттә көтеп алган кунаклар-Кыш бабай белән Кар кызы – болар барысы да «Әкият» курчак театрында булачак. Программа төрле яшьтәге тамашачыларга исәпләнгән.
Эпидемиологик хәлне исәпкә алып, быел Яңа ел тамашалары фойеда түгел, ә театрның Зур залында узачак. Тамашачылар утырган урыннарында булса да интермедиядә катнаша ала. Чара барышында Роспотребнадзор рекомендацияләре буенча барлык куркынычсызлык чаралары да үтәләчәк.
Театр фойесында бәйрәм патшасы – чыршы, музыка һәм махсус яңа ел фотозонасы булачак.
Тамашалар 10 гыйнварга кадәр дәвам итәчәк.