«Татаркино» Татарстанның танылган шәхесләренә багышланган видеопроект башлап җибәрә
1 августта «Татаркино» Татарстанның танылган шәхесләренә багышланган видеопроект башлап җибәрә. Республиканың күренекле кешеләре турында 5-6 минутлык видеороликлар әзерләнәчәк. Әлеге проект ТАССРның 100 еллыгын бәйрәм итү кысаларында тормышка ашырыла.
«Топ-100» видеопроектын «Татаркино»ның Instagram TV һәм ютуб-каналында карарга мөмкин булачак. Видеороликлар сериясендә 1920 елдан башлап Татарстанда яшәгән һәм эшләгән, хәзерге вакытта исән булмаган күренекле кешеләр турында сөйләячәкләр.
«Татаркино» директоры Миләүшә Айтуганова билгеләп үткәнчә, әлеге видеопроект - цифрлы форматка күчерелгән кинохроника өчен «икенче тормыш» бирү мөмкинлеге.
«Топ-100» нең беренче унлыгына Габдулла Тукай, Мирсәет Солтангалиев, Муса Бигиев, Муса Җәлил, Абдулла Алиш, Фатих Кәрим, Салих Сәйдәшев, Сара Садыкова, Александр Ключарев, Рөстәм Яхин кебек күренекле кешеләр кергән.