Алабуга музей-тыюлыгында XVIII-XIX гасырларда кулдан язылган Коръән битләрен күреп булачак

2018 елның 6 марты, сишәмбе

Иртәгә 13.00дә Алабуга дәүләт музей-тыюлыгының Күргәзмәләр үзәгендә ике күргәзмә ачыла.

Беренчесе  - “Коръән битләре” – Алабуга музей-тыюлыгы белән “Ихтимал” мөселман халыкларының тарихи һәм мәдәни  мирасын саклап калу үзәгенең (Уфа, Башкортстан) уртак проекты.

Аңарда XVIII-XIX гасырлар Коръәненнең 54 кулдан язылган бите тәкъдим ителә. Экспозициядә XI гасырда пергаментта язылган 4 уникаль бит аерым урынны алып тора.

Икенче күргәзмә Татарстан Республикасының атказанган сәнгать эшлеклесе Нәҗип Нәккаш каллиграфиясенә багышлана.

Күргәзмәләр 25 мартка кадәр эшләячәк.